सुदूरपश्चिममा पनि संसद विघटन विरुद्ध प्रदर्शन, ‘संविधानको रक्षाका लागि आन्दोलन’

 नेपाल कम्युनिष्ट पार्टी (नेकपा) नेता भीम रावलले अहिलेको विरोध संविधानको रक्षाका लागि भएको बताएका छन । नेकपा कैलालीले आज प्रतिनिधिसभा विघटनको विरोधमा धनगढीमा आयोजना गरेको कार्यक्रममा उनले विरोध पद वा स्वार्थका लागि नभई नेपालको संविधानको रक्षाका लागि भएको दावी गरे ।

नेता रावलले दृढ अठोटका साथ अविलचित भएर अगाडि बढ्न नेता तथा कार्यकर्तालाई आग्रह गरे । उनले नेकपाको बहुमत सचिवालय, बहुमत स्थायी कमिटी रहेको जिकिर गर्नुभयो । नेता रावलले भने, ‘केन्द्रीय कमिटी मात्र नभई सातै प्रदेशका अत्यधिक कार्यकर्ता र जनता पनि छन्, विश्वासका साथ अगाडि बढ्नुहोला ।’

सुदूरपश्चिम प्रदेश इन्चार्ज भीम रावलले प्रधानमन्त्री केपी शर्मा ओलीबाट असंबैधानिक कदमकाविरुद्ध सबै जनता एकजुट भएर लाग्नुपर्ने बेला आएको बताएका छन् । नेपाल कम्युनिस्ट पार्टी (नेकपा) को प्रचण्ड–माधव पक्षल सरकारको असंवैधानिक कदमका विरुद्ध आज धनगढीमा आयोजित कार्यक्रमलाई सम्बोधन गर्दै उनले सो कुरा बताएका हुन् । 

रावलले भने, ‘प्रधानमन्त्री ओली निरंकुश र जनविरोधी हुँदै गएपछि प्रश्न तेर्सिएको छ । ओलीले जनतामाथि विश्वासघात गरेका छन् । जनताको जनमतलाई कुल्चेका छन् । सहिदको रगत, पसिनाको बलमा संविधानसभाबाट बनाइएको संविधानलाई सरकारले कुल्चिएको छ ।’